АУҒАНСТАН ЖЕРІНЕН ЖАУЫНГЕРЛЕРДІ ШЫҒАРУ КҮНІ
15 ақпан – бұл күнді тек күнтізбедегі қарапайым дата деп айтуға болмайды. Ол – жүректерге жара салған, мыңдаған отбасының тағдырын өзгерткен, көзсіз ерліктің, ауыр сынақтың куәсі болған тарихи сәт. Дәл осы күні, 1989 жылы Кеңес әскерінің соңғы легі Ауғанстан жерінен шығарылып, 9 жылға созылған қанды соғыс ресми түрде аяқталды. Ауған соғысы – Кеңес Одағы тарихындағы ең қайғылы әрі күрделі кезеңдердің бірі болды. 1979 жылдың желтоқсанында басталып, 1989 жылдың ақпанына дейін жалғасқан бұл қақтығысқа Қазақстаннан 20 мыңнан астам жауынгер аттанып, солардың жүздегені майдан даласынан оралмады. Олар жат жерде ерлікпен қаза тапты, ал тірі оралғандар ауыр жарақат пен жан күйзелісін арқалап келді. Сол жылдары көптеген бозбалалар мектеп партасынан бірден майданға аттанды. Олар оқ атуды емес, өмірді жаңа бастап жатқан кез еді. Бірақ тағдыр оларға ерте есейіп, от пен оқтың арасынан өтуге мәжбүр етті. Бүгінде сол сарбаздардың көпшілігі ардагер атанып, бейбіт өмірде жастарға үлгі болып отыр.15 ақпан – бұл батырларды еске алу, олардың жанқиярлығын ұмытпау күні. Әрбір ардагердің жүрегінде – соғыстың салмағы, әр отбасының жүрегінде – жоғалтудың ізі. Бұл күн – көз жасына, сағыныш пен шүкіршілікке толы күн. Бірақ ең бастысы – бұл күн бейбітшіліктің құндылығын еске салады. Мектебімізде осы күні тәрбие сағаттары, ардагерлермен кездесулер, бейнебаяндар мен эссе байқаулары өткізіледі. Бұл – тек ресми шара ғана емес, жастарды отансүйгіштікке, елін қорғауға дайын болуға баулитын үлкен тәрбие құралы.Бүгінгі ұрпақ үшін Ауған соғысы алыста қалған тарих секілді көрінуі мүмкін. Алайда әрбір ерлік ұмытылмаса ғана тарих өмір сүреді. Сол соғыста шейіт болған батырлардың рухына тағзым ету – біздің адамдық әрі азаматтық парызымыз. Олардың ерлігі – бейбіт өміріміздің негізі, бүгінгі тыныш таңымыздың өтеуі. Ешқандай соғыс қайталанбасын. Жастар тек кітаптан емес, өмірден, тірі куәлардан сабақ алсын. Ардагерлердің амандығы – ел амандығы. Біз оларды мақтан тұтамыз, ерліктерін ұмытпаймыз және келешек ұрпаққа жеткіземіз.
