"МЕНТАЛДЫ АРИФМЕТИКА – ОЙ-ӨРІСТІҢ КҮШІ, БОЛАШАҚҚА ЖОЛ"

Мектебімізде заманауи білім беру үрдістерін енгізу мақсатында оқушылардың зияткерлік қабілеттерін дамытуға бағытталған бірқатар пәндер мен курстар жүргізілуде. Солардың бірі – менталды арифметика. Бұл пән бүгінде тек қосымша үйірме ретінде емес, негізгі білім беру бағыттарының бірі ретінде қарастырылып отыр. Оның басты ерекшелігі – баланың логикалық ойлау қабілетін дамытып, сандық операцияларды жылдам әрі нақты орындауға үйретуі.

Менталды арифметиканың басты мақсаты – оқушының мидың екі жарты шарын бір мезгілде жұмыс істеуге ынталандыру. Яғни, оң жарты шар – шығармашылық пен образдық ойлау үшін жауапты болса, сол жақ жарты шар – логикалық, математикалық есептеулерге бағытталған. Бұл пән арқылы екі жарты шардың белсенді жұмысы үйлесімді дамиды, нәтижесінде бала ойлау, есте сақтау, зейін қою және шоғырлану қабілеттерін жетілдіреді.

Сабақтар барысында балалар абакус құралын пайдалана отырып, күрделі есептерді санаулы секундтарда шығара алады. Бұл әдіс олардың математикалық сауаттылығын арттырып қана қоймай, сенімділігін нығайтады, зияткерлік белсенділігін арттырады. Сонымен қатар, менталды арифметикамен айналысатын оқушылардың өз оқуында жетістікке жету көрсеткіштері жоғары болатыны тәжірибе жүзінде дәлелденген.

Пәннің тағы бір артықшылығы – балалардың сабырлылық пен төзімділікке үйренуі. Себебі, әр тапсырманы ой елегінен өткізу, есепті көз алдына елестету, нақты шешім қабылдау – үлкен жауапкершілікті талап етеді. Мұндай дағдылар тек математикада ғана емес, өмірдің барлық салаларында қажет болатын қасиеттердің қалыптасуына ықпал етеді.

Осылайша, менталды арифметика – тек есеп-қисап пәні емес, ол – баланың жан-жақты дамуына ықпал ететін, зияткерлік әлеуетін арттыратын маңызды құрал. Мектебімізде бұл пәнге ерекше көңіл бөлініп, арнайы дайындалған білікті мамандар дәріс береді. Алдағы уақытта да бұл бағыттағы жұмыс жалғасын тауып, шәкірттеріміздің үлкен жетістіктерге жетуіне себепші болады деп сенеміз.