ДҮНИЕЖҮЗІЛІК ҚАУІПСІЗ ИНТЕРНЕТ КҮНІ

   11 ақпан 2025 жылы біздің білім ордамызда бүкіл әлемде аталып өтетін маңызды күн – Дүниежүзілік қауіпсіз интернет күні аталып өтті. Бұл күн – тек бір күндік іс-шара ғана емес, ол қазіргі қоғамдағы маңызды мәселелердің бірі – интернеттегі қауіпсіздік мәдениетін қалыптастыруға бағытталған үлкен бастама. Қазіргі таңда интернет – білім мен ақпараттың көзі, байланыс пен шығармашылықтың алаңы. Алайда оның мүмкіндіктерімен қатар, түрлі қауіп-қатерлер де қатар жүреді. Осыған орай, біздің мақсатымыз – оқушыларды тек интернеттің пайдасын көруге емес, сонымен қатар онда кездесетін қауіптерден қорғана білуге, саналы және жауапты пайдаланушы болуға үйрету. Іс-шара аясында мектебімізде түрлі бағыттағы танымдық жұмыстар ұйымдастырылды. Әсіресе, "Қауіпсіз интернет – балалар көзімен" тақырыбында өткен сынып сағаттары мен ашық сабақтар оқушылардың ерекше қызығушылығын тудырды. Олар тек тыңдаушы емес, өз ойларын ашық айтып, интернеттегі жақсы және жағымсыз жақтарды салыстырып, өз тәжірибелерімен бөлісті. Сонымен қатар, киберқауіпсіздік тақырыбындағы бейнероликтер мен презентациялар көрсетіліп, олар бойынша пікірталас жүргізілді. Бұл – оқушылардың цифрлық сауаттылығын арттырып қана қоймай, интернеттегі мінез-құлық нормалары туралы түсініктерін тереңдетуге септігін тигізді. Қызықты әрі мазмұнды викториналар мен сауалнамалар арқылы балалар өз білімдерін сынап, жаңа ақпараттармен толықты. Ал ата-аналар қауымына балалардың онлайн қауіпсіздігін қамтамасыз етуге көмектесетін кеңестер ұсынылды. Жалпы алғанда, бұл күн оқушылар үшін де, ұстаздар үшін де ерекше әсер қалдырды. Интернет – үлкен мүмкіндік. Бірақ бұл мүмкіндікті дұрыс пайдалану – әрбіріміздің міндетіміз. Сондықтан қауіпсіз интернет тек технологияның емес, тәрбиенің, білім мен жауапкершіліктің нәтижесі екенін тағы бір мәрте сезіндік.