“AlanCup-2024” ДЕБАТ ТУРНИРЫ

      Мектебімізде оқушылардың сыни ойлау қабілетін дамыту, шешендік өнер мен көшбасшылық дағдыларын шыңдау мақсатында “AlanCup-2024” атты дебат турнирі ұйымдастырылды. Бұл сайыс — жас зияткерлердің білімін, сөз саптау шеберлігін және пікір білдіру мәдениетін сынайтын маңызды алаңға айналды. Турнирге қаламыздың алты мектебінен 12 команда қатысып, өзара тартысты әрі мағыналы пікірталас өрбітті. Әр қатысушы өз ойын еркін жеткізіп, қарсы пікірлерге дәлелді жауап қайтарып, терең талдау жасай білді. Дебаттар барысында оқушылар тек ақпарат алмасып қана қоймай, өзара құрмет пен интеллектуалдық бәсекеге негізделген қарым-қатынас орната білді. Жарыс ағылшын және орыс лигаларында өтті. Ағылшын лигасында мектебіміздің оқушылары Абдашим Батыржан мен Сагиндыков Тимур өздерінің терең білімін, логикалық ойлауын және ораторлық шеберлігін көрсетіп, жүлделі орынға ие болды. Ал орыс лигасында Уразбаев Арнур мен Токтас Диас ерекше көзге түсіп, топ жарып шықты.

Турнир нәтижесі — оқушыларымыздың қажырлы еңбегі мен үздіксіз дайындықтарының жемісі. Жеңімпаздарымызды шын жүректен құттықтаймыз! Бұл жетістік – тек бір күндік жеңіс емес, болашақ көшбасшылардың қалыптасуына жасалған сенімді қадам. Осындай зияткерлік сайыстар оқушылардың жан-жақты дамуына, өз ойы мен ұстанымын сенімді жеткізе алатын, еркін ойлайтын тұлға болып қалыптасуына үлкен үлес қосады. “AlanCup-2024” турнирі — мектеп қабырғасындағы білім мен мәдениеттің тоғысқан тағылымды шарасы болды.